ຜ່ານການຈັດຕັ້ງການຮຽນ-ການສອນທີ່ຜ່ານມາເຫັນວ່າ ສະຖາບັນ ຣັຕນະ ບໍລິຫານທຸລະກິດ ໄດ້ສ້າງບຸກລະກອນ ທີ່ມີຄຸນນະພາບອອກຮັບໃຊ້ສັງຄົມໃນລະດັບປະລິນຍາຕີບໍລິຫານທຸລະກິດ ທັງໝົດ 13 ລຸ່ນ ມີຜູ້ສຳເລັດການສຶກສາໄປແລ້ວ ທັງໝົດ: 5.010 ຄົນ, ເປັນຍິງ 2.866 ຄົນ. ແລະ ມີຜູ້ສຳເລັດການສຶກສາຫລັກສູດປະລິນຍາໂທບໍລິຫານທຸລະກິດ ທັງໝົດ 8 ລຸ່ນ: ມີຜູ້ສຳເລັດການສຶກສາໄປແລ້ວ ທັງໝົດ: 456 ຄົນ, ເປັນຍິງ 216 ຄົນ. ຊຶ່ງນັກສຶກສາຜູ້ທີ່ສຳເລັດໄປແລ້ວນັ້ນ, ສ່ວນຫລາຍກໍ່ໄດ້ເຂົ້າເປັນພະນັກງານໃນອົງການຈັດຕັ້ງຂອງພັກ-ລັດ, ເອກະຊົນ ແລະ ມີຫຼາຍຄົນກາຍເປັນການນຳພັກ-ລັດ ແລະ ຫຼາຍຄົນກາຍເປັນຜູ້ປະກອບການຢູ່ໃນແຖວໜ້າຂອງບັນດາທຸລະກິດໃນ ສປປ ລາວ, ຈຳນວນໜຶ່ງກໍ່ໄດ້ໄປສຶກສາຕໍ່ເພື່ອຍົກລະດັບໃຫ້ສູງຂຶ້ນທັງພາຍໃນ ແລະ ຕ່າງປະເທດ. ນັກສຶກສາທຸກຄົນທີ່ຈົບອອກໄປສະເລ່ຍ 90 ກວ່າເປີເຊັນ ແມ່ນມີວຽກເຮັດງານທຳ ແລະ ມີໜ້າທີ່ຕ່ຳແໜ່ງທີ່ໝັ້ນຄົງ. ຈາກຜົນງານທີ່ຜົ້ນເດັ່ນ ແລະ ປະສົບການຂອງຄະນະຜູ້ບໍລິຫານ, ພະນັກງານ, ແລະ ຄູ-ອາຈານ ຂອງ ສະຖາບັນ ຣັຕນະ ບໍລິຫານທຸລະກິດ ໄດ້ມີການເສີມສ້າງ ບຸກຄະລາກອນອອກຮັບໃຊ້ສັງຄົມ, ເປັນທີ່ຍອມຮັບຈາກສັງຄົມ ແລະ ຕະຫລາດແຮງງານ ຊຶ່ງບົ່ງບອກເຖິງປະສິດທິພາບ ແລະ ປະສິດທິຜົນ ຂອງສະຖາບັນ ແລະ ຄວາມພ້ອມທີ່ຈະສືບຕໍ່ໃຫ້ແກ່ການຈັດຕັ້ງການຮຽນ-ການສອນໃຫ້ແກ່ສັງຄົມຕໍ່ໄປ.